شن بندير في 2016؟

قاعدين في بداية السنة، الفضيحة أنه أوكي تقدر تمشيها لواحد يكتب سنة 2015 مازال بما أنه هاه قاعدين جدد وماحلش تعود يغير  طريقة كتيبته للتاريخ، لكن أنا قاعد مبرمج ع 2012! أنا مش من جماعة تحديد أهداف ع رأس كل سنة في مواضيح حياتية وهكي لكن عندي أهداف غدائية زي وكال البصل من سنة 2011، وكال البكيوة والباذنجان والبطاطا الحلوة والقسطل في 2014/2015، والتوقيف عن شرب جميع أنواع القازوزة من سنة 2012 بعد ما وقفت ع البيبسي والكوكاكولا من الإعدادي، السنة قررت نوقف نشرب عصائر معلبة وهضا ممكن أصعب تحدي في الموضوع.

الليستة متع السلة الغدائية اللي مفروض نوسعها السنوات الجاية مازالت معبية بحاجات نكرها لعند توا زي الكوسا والفطر والكرنب والقعمول والفجل والجرجير وإلخ.

برا موضوع الوكال، في أقل من شهر جاي حتمر 5 سنوات من بداية التدوين الفكرة اللي اضحك أن كل سنة لما ادير برمة على تدويناتك القديمة تنفلق ضحك على السذاجة المكتوبة، في السنة هذي بنحاول نغير من نظامي العربي الفصيح للعامية، أو دوتي المكسرة الهجينة مبين لغات المنطقة المتشرتعة يلي تخلي الناس تضحك عليك وين ما كنت وتعقب ع كل كلمة يحسوا بأن نطقها غلط وأنت تحسها صح!

المهم، أهم حاجة السنة هذي بنديرها هي في موضوع الكتابات، المكتبة تعبت تقريبًا بالكتابات ومفروض أنقص من الطمع شوية ومافيهش بأس لو خليت غيري يقرأ كتاب قريته، عشان هكي حتقعد في صفحة دائمة في الblog حيكون فيها قائمة محدثة بالكتابات اللي يقدر أي حد مقيم في طرابلس أو بنغازي أن يستعيرهن بحسب القائمة، مش كل الكتابات اللي عندي حيكونن في الليستة لأنه الكرم الواجد مش كويس حتى هو، في كتابات غاليات -مش ماديًا- ما نقدرش نفرط فيهن وفي نسبة خطورة في عملية الإعارة..

عيب اعارة الكتابات هي أنه الكتاب معش ينردلك أو ينردلك بعد تشوه، عشان هكي قبل ما تفكر تستعير احترم اللي بتستعير منه يا أخي واحترم الورق اللي قدامك!

الكتابات اللي حيكونن متوفرات للاعارة حتلوقهن ديمة في الصفحة هذي.

أو باللينك المختصر: http://bit.ly/WBook

ليلتكم/يومكم سعيد/ة